Foto: Pixabay
Duž čitavog Jadrana, sva primorska mjesta imaju isti problem - ljudi tokom noći i ranog jutra ostavljaju peškire na plaži kako bi ‘rezervisali’ najbolja mjesta.
Da bi doskočili tome, u hrvatskom mjestu Medulin, kupe sve što nađu i - naplate kaznu.
To se desilo jednoj čitateljki hrvatskog lista 24 sata koja im se požalila:
"Komunalni redari dolaze na plažu ujutro u 8 sati, Pokupe sve što nađu i ako niste u blizini odnesu stvari ispred zgrade općine Medulin i odlože na pod." - prenosi list 24 sata riječi čitateljke koja je ostavila svoje stvari na plaži, a kad se vratila – njenih stvari više nije bilo.
"Kad se vratite vi ste u šoku jer nema vaših peškira, itd. i ne znate tko ih je otuđio. Onda se nađe neka dobra dušica koja je sve to promatrala i kaže vam da morate ići u Medulin po svoje stvari. Još apsurdnije da morate platiti kaznu od 250 kn (nešto više od 30 eura) inače ne dobijete svoju robu natrag. A naši peškiri s kojima se brišemo su za njih smeće kad su bačeni na pod. To se upravo meni dogodilo, a bila sam s malim djetetom od 3 mjeseca. Uspjela sam slikati stvari iako mi komunalni redar nije dao." - rekla je ona za 24 sata.
List je potom kontaktirao pročelnika Upravnog odjela za komunalnu izgradnju i održavanje (Opština Medulin) Gorana Peruška koji je rekao da od početka sezone provode akciju u kojoj sakupljaju peškire i ostale rekvizite s plaže koje ljudi ostavljaju tokom noći.
"Ljudi tokom noći i ranog jutra ostavljaju peškire na plaži kako bi ‘rezervisali’ najbolja mjesta. Mi provodimo tu akciju cijele sezone. Javila nam se gospođa koja se i vama požalila, te ćemo vidjeti što se dogodilo i zašto su joj se uklonile stvari." - rekao je Peruško.
Sve više lokalnih uprava duž jadranske obale počinje da se bori protiv "rezervacije" mjesta na plaži. Poznat je i nedavni slučaj kada je načelnica Podgore, 28-ogodišnja Petra Radić, naredila da se uklone svi peškiri i stvari kojima kupači u njenoj opštini preko noći čuvaju svoje mjesto na plaži.
U kamion su tako utrpane ležaljke, peškiri, madraci na naduvavanje, a načelnica je sve objavila na Facebooku i redom pokupila pohvale.
 |
| Foto: Facebook Petra Radić |
'Pomorsko dobro je javno dobro', naslovila je svoju objavu mlada načelnica Podgore i između ostalog napisala:
"Svi rekviziti su u ranim jutarnjim satima uklonjeni s javne površine jer danas želim slobodnu plažu za sve. To isto želim i sutra, preksutra, dogodine..."
Inače, Podgora, kao i drugi dijelovi Makarske rivijere već godinama su poznati po ovakvoj 'rezervaciji' mjesta na plaži, pa se o tome i prije moglo čitati u medijima.
Ovakvim "rezervacijama" pretrpana je i Novska obala s jednom bitnom razlikom - kod nas niko ne reaguje. Ni Komunalna policija, ni Komunalno -stambeno, ni Ćistoća... Radnici, naravno, ne mogu samoinicijativno ništa da urade, ali rukovodstva, odnosno načelnici komunalnih službi prave se da ne vide ovaj problem i time se ponovo stavljaju na stranu selektivnog provođenja zakona.
Naravno, zadovoljstvo gosta treba biti na prvom mjestu ali ne na štetu drugih gostiju koji se takođe žele kupati jer su zato i došli na more, a koji zbog ovakvih "rezervacija" neće biti nimalo sretni jer pravilo je jedno, jedino i potpuno jasno - more pripada svima.
Коментари
Постави коментар